第二輪消費券一出，好多人衝嚟我地度買結他，絕大部份都係後生仔女，同佢地傾過計，就令我更加明白而家嘅年青人係點去選擇一樣野，追求緊啲咩野，需要啲咩野
我地呢到冇好多好多嘅選擇，冇好貴好高檔，好似收藏品嘅結他，又冇好cheap好廢嘅垃圾結他，呢度得啲好實際，性價比好嘅，原來就中正晒後生，年青人想要嘅野
年紀大啲啲，有啲人生經歷，又有啲經濟能力，好多時會買返細個想要，當時冇能力買嘅野; 最多聽倒佢地講就係買Fender Gibson，而家有能力就買支好啲，通常都會去到custom shop果個級別，或者係啲當年出名嘅artist model
而我地就冇呢啲結他賣，冇呢啲結他可以賣俾佢哋，但都會結識倒好多呢一個層面嘅朋友，因為佢哋嚟整結他，所以成日都有得同佢哋傾計，有好多當年嘅嘢，都係佢地分享，同話俾我哋知先知，聽佢地講下故仔，會覺得好正，長知識
而相反一啲年紀比較細啲嘅小朋友，未能有經濟能力，想搵啲幾百蚊結他，我地又係幫唔倒佢地，因為我哋好清楚果個質素嘅結他，真係唔得，又唔好彈又唔好聽，又經常出現問題，所以冇入呢類貨返嚟賣，不過我地呢啲樓上鋪，佢地會上網搵，所以都會嚟買下accessory
而後生讀大專果班，會自己做下part time, 或者出嚟做咗幾年野嘅年青人，靠自己努力工作去搵小小錢，辛苦工作完，想買下自己鍾意嘅野，而自己又唔係最高消費力嘅一群，所以就會精打細算，上下網做下research, 搜尋性價比高嘅產品，睇準先出手就係佢地嘅特質，佢地要搵呢類野，我地就幫倒手啦
佢地好清楚自己要咩，選擇嘅方式好清晰
第一要質素！平唔係佢地要嘅野，平係去到幾平都有，而且佢地已深明平野冇好，影響到練習質素之餘，用兩用就出現問題，攞去整又煩又使錢，仲得不常失 另外要底！咁咩係底？用同樣價錢，去唔同鋪頭試，邊個高質就係底，就出手
其實好多個人係之前已上嚟我地度試過，出去其他地方又試下，格完價，衡量完之後，先再返嚟我地度買；有啲就係第二度試完，上嚟我地度又試下，佢地有啲會好直接同我地唔夠錢，又驚走寶，就落訂keep俾佢，等出糧先過嚟找數帶支結他走
我好鍾意佢地有勇氣問可唔可以留俾佢地，因為証明佢地真係好想買倒想要嘅野，又知手快有手慢冇，呢種感覺幾特別，諗起自己細個冇錢，好想買一啲野，而我個人又比較含蓄、害羞，真係唔好意思開口同人講落訂叫人地鋪頭keep俾我，所以miss好多機會，成日走寶，當然而家年代又唔同，落訂keep起都好常見
當然有啲就一試就啱晒feel, 試耐啲都嫌嘥時間，喳喳林帶返屋企試自己嗰set野
見倒佢地買倒心頭好，我都好鄧佢哋開心，所以有啲我會問佢哋，可唔可以俾我影張相，俾我地記錄佢哋開心嘅一刻，今次show下佢哋嘅戰利品，性價比高嘅Fujigen結他先，買倒好野係開心，返到去要練野啦喂～